தகவல் தொழினுட்ப பகுதிக்கு அன்புடன் வரவேற்கின்றோம்.

WIFI முழு அர்த்தம் என்ன?

90% பேருக்கு இது தெரியாது! நவீன காலத்தில் இண்டர்நெட் வேகம் நாளுக்கு நாள் அதிகரித்து வருகிறது. 2ஜி காலம் போய் தற்போது 5ஜி, ஏர் ஃபைபர் என்ற நிலைக்கு டெக்னாலஜி வேகமாக வளர்ந்து விட்டது. ஒரு காலத்தில் கம்ப்யூட்டர் செண்டர்களில் மட்டும் தான் இண்டர்னெட் வசதி இருக்கும். இதற்கு காதலர் தினம் படமே சான்று. காதலர்களிடம் பேசுவதற்காகவே ப்ரவுசிங் செண்டர் போவது போன்று காட்சிகள் அமைந்திருக்கும். அன்றைய காலங்களில் தினசரி போனுக்கே ரூ.10 முதல் ரூ.50 வரை தான் மக்கள் ரீசார்ஜ் செய்வார்கள். ஆனால் தற்போதைய காலத்தில் இண்டர்நெட் மூலம் உலகமே உள்ளங்கைக்குள் அடங்கிவிடுகிறது. வீடுகள், செல்போன் என அனைத்திலும் இண்டர்நெட் வந்துவிட்டது. ஒருவரிடம் இருந்து மற்றொருவரிடம் இருந்து கூட இந்த இண்டர்நெட்டை நாம் பகிர்ந்து கொள்ளும் அளவிற்கு டெக்னாலஜி வளர்ந்துவிட்டது. இன்றைய காலங்களில் WIFI தெரியாதவர்கள் யாருமே இல்லை. சிறு குழந்தைகளே யூடியூப் பார்க்க வேண்டும் WIFI ஆன் செய்யுங்கள் என்று கூறுகிறது. இந்த அளவிற்கு WIFI என்ற வார்த்தை பரவி வரவே, இதன் விரிவாக்கம் யாருக்காவது தெரியுமா என்றால் அது பலருக்கும் கேள்விக்குறியாக தான் இருக்கிறது. சமீப காலமாகவே இணையத்தில் பல ஆங்கில பெயர்களின் விரிவாக்கம் குறித்த வினாக்கள் வைரலாகி வருகிறது. இதற்கு பலருக்கும் பதில் தெரியவில்லை என்றால் பதில் என்னவாக இருக்கும் என ஆர்வம் கொள்கிறார்கள். அப்படி ஒரு கேள்வி தான் தற்போது இணையத்தில் பகிரப்பட்டு வருகிறது. அது தான் WIFI விரிவாக்கம் என்ன? இதற்கான பதிலை தற்போது தெரிந்து கொள்ளலாம். WI-FI என்பதன் முழு விரிவாக்கம் Wireless Fidelity ஆகும். இது சாதனங்கள் இணையத்தை அணுகவும் நெட்வொர்க்கில் உள்ள பிற சாதனங்களுடன் இணைக்கவும் அனுமதிக்கும் வயர்லெஸ் தொழில்நுட்பமாகும். WIFI-ன் வரலாறு என்ன தெரியுமா? கீக்ஸ் ஃபார் கீக்ஸின் கூற்றுபடி 1999ஆம் ஆண்டில் மின் மற்றும் மின்னணு பொறியாளர்கள் நிறுவனம் முதன்முறையாக WIFI-l 802.112b-ஐ அறிமுகப்படுத்தியது. இது மிகவும் பரவலாக பயன்படுத்தப்படும் WIFI மாதிரியாகும். வெறும் பைட்ஸ் (bytes) ஆக இருந்தது தான் தற்போது Mb, Gb அளவிற்கு உயர்ந்து வளர்ந்துள்ளது. வெறும் 802 பைட்ஸ் இருந்த இண்டர்நெட் வேகம் தற்போது 5ஜிபி வரை உயர்ந்து சாதனை படைத்துள்ளது. தற்போது ஏஐ காலத்தை நோக்கி நகரும் நிலையில், இன்னும் இண்டர்நெட் வேகம் வளர்ந்து வரும் என சொல்லப்படுகிறது.

மைக்ரோசொப்ட் கீபோர்டில் அறிமுகமாகும் புதிய அம்சம்

மைக்ரோசொப்ட் நிறுவனம் தனது கணினி விசைப்பலகையில் புதிய அம்சமொன்றை அறிமுகப்படுத்தியுள்ளது. அந்த வகையில், செயற்கை நுண்ணறிவு அல்லது ஏஐ சாவியை மைக்ரோசொப்ட் அறிமுகப்படுத்தியுள்ளதாக தெரிவிக்கப்பட்டுள்ளது. விண்டோஸ் 11 இயக்க முறைமை மென்பொருளை (os) உபயோகிக்கும் பயனர்கள் இதன்மூலம் செயற்கை நுண்ணறிவு மென்பொருள் கருவியான கோபிலட்டை அணுகலாம் என மைக்ரோசொப்ட் நிறுவனம் தெரிவித்துள்ளது. மேலும், தகவல்களைத் தேடவும், மின்னஞ்சல்களை வடிவமைக்கவும் மற்றும் படங்களை உருவாக்கவும் கோபைலட் மென்பொருளை பயனர்கள் பயன்படுத்தலாம் என கூறப்படுகிறது. மைக்ரோசொப்ட் நிறுவனம் 1994ஆம் ஆண்டில் விண்டோஸ் மெனு உபயோகத்துக்கான ஸ்டார்ட் சாவி ஒன்றை விசைப்பலகையில் இறுதியாக அறிமுகப்படுத்தியது.பின்னர் 30 ஆண்டுகள் இடைவெளியில், அதிகரிக்கும் செயற்கை நுண்ணறிவின் தாக்கத்துக்கு ஈடுகொடுக்கும் வகையிலான ஏஐ சாவி ஒன்றை, தனது விசைப்பலகையில் மைக்ரோசாப்ட் நிறுவனம் அறிமுகம் செய்கிறது. மைக்ரோசொப்டுடன் இணைந்து செயல்படும் மடிக்கணினிக் மற்றும் கணினி உற்பத்தியாளர்கள் இந்த புதிய சாவியை அறிமுகப்படுத்த இணக்கம் தெரிவித்துள்ளதாக அந்நிறுவனம் அறிவித்துள்ளது. தற்போது விசைப்பலகையில் உள்ள ஸ்பேஸ் சாவியின் வலதுபுறம் குறித்த ஏஐ சாவி இடம்பெற உள்ளது. வெறும் இணையவழிச் சேவைகள் மட்டும் இல்லாமல் உள்பயன்பாட்டிற்கு ஏற்ற வகையில் இந்த கோபைலட் செயல்படும் எனக் கூறப்படுகிறது. மைக்ரோசொப்ட்டின் வன்பொருள்(hardware) துணை நிறுவனங்கள் இதற்கான தயாரிப்புகளில் ஈடுபட்டுள்ளதாக நிறுவனம் அறிவித்துள்ளது. இந்நிலையில் மைக்ரோசாப்ட் பயன்பாட்டாளர்கள் தங்களது கணினியை அப்கிரேட் செய்துகொள்வது அவசியம் என கூறப்படுகிறது. புதிதாக கணினி வாங்க விரும்புவோர், இந்த மாற்றங்களை உள்ளடக்கிய விசைப்பலகையை எதிர்பார்க்கலாம் என கூறப்படுகிறது.

Google Time Travel

1980களில் உங்க ஊர் எப்படி இருந்திருக்கும்னு பார்க்க ஆசையா..? வந்துவிட்டது "Google Time Travel ".. உபயோகிப்பது எப்படி..???கூகிள் அதன் மில்லியன் கணக்கான பயனர்களின் வசதிக்காக அற்புதமான அம்சத்தை அறிமுகப்படுத்தியுள்ளது. 30 ஆண்டுகளுக்கு முன்பு ஒரு நகரம் எப்படி இருந்தது என்பதைக் கண்டறிய உதவும் ஒரு அம்சத்தை கூகிள் மேப்ஸ் மற்றும் கூகிள் எர்த் ஆகியவற்றில் கூகுள் சேர்த்துள்ளது. உலகம் முழுவதும் விஷயங்கள் வேகமாக மாறி வருகின்றன. தொழில்நுட்பம் வளர்ந்து வருவதால், நகரங்களும் வேகமாக மாறி வருகின்றன. முன்பிருந்ததை ஒப்பிடும்போது, இப்போது கிட்டத்தட்ட எல்லா இடங்களும் முற்றிலும் மாறிவிட்டன. 30-40 ஆண்டுகளுக்கு முன்பு ஒரு இடத்திற்குச் செல்ல விரும்பினால் அது சாத்தியமில்லை, ஆனால் தொழில்நுட்பத்தின் உதவியுடன் இந்தப் பணியை ஓரளவிற்கு சாத்தியமாக்க முடியும். அந்தவகையில் கூகுள் எந்த இடத்தின் பல வருட பழமையான காட்சியையும் நீங்கள் காணக்கூடிய ஒரு அம்சத்தைக் கொண்டு வந்துள்ளது. கூகுளின் இந்த அம்சம் பயனர்களுக்கு எந்த இடத்தையும் அதன் அசல் நிலையில் காண்பிக்கும் திறனைக் கொண்டுள்ளது. 30-40 ஆண்டுகளுக்கு முன்பு உங்கள் நகரம் எப்படி இருந்தது என்பதை இப்போது உங்கள் தொலைபேசியிலோ அல்லது கணினியிலோ பார்க்கலாம். இந்த வசதியை பயன்படுத்த விரும்பினால், இதற்காக நீங்கள் கூகுள் மேப்ஸ் அல்லது கூகுள் எர்த் செல்ல வேண்டும். இப்போது நீங்கள் பார்க்க விரும்பும் இடத்தைத் தேட வேண்டும். இப்போது நீங்கள் லேயர்கள் விருப்பத்திற்குச் சென்று, பின்னர் டைம் லேப்ஸ் விருப்பத்தைத் தேர்ந்தெடுக்க வேண்டும். இந்த வழிமுறைகளைப் பின்பற்றுவதன் மூலம், அந்த இடம் பழைய காலத்தில் எப்படி இருந்தது என்பதை நீங்கள் எளிதாகக் காண முடியும்.

நிலநடுக்கம் குறித்த தகவலைப் பெற விருப்பமா

Android 15 இயங்குதளத்துடன் வரும் ஸ்மார்ட்போன்களில் நிலநடுக்க எச்சரிக்கை பெற புதிய வசதியை கூகுள் அறிமுகப்படுத்தியுள்ளது. இந்த வசதியின் பெயர் Earthquake Detector. இந்த அம்சம் பல நாடுகளில் செயல்படுகிறது. Android பயனர்கள் தங்கள் செட்டிங்ஸில் சென்று இந்த அம்சத்தை செயல்படுத்தினால், அருகிலுள்ள நிலநடுக்கங்கள் குறித்து உடனடி எச்சரிக்கைகளை பெற முடியும்.

1. உங்கள் மொபைலில் Android 15 இயங்குதளம் இருக்கிறதா என்பதை உறுதி செய்யவும். (Pixel, Samsung, OnePlus போன்ற பல ஸ்மார்ட்போன்களில் உள்ளது)
2. Phone Settings > Safety & Emergency என்பதைத் தேர்வு செய்யவும்.
3. அதில் Earthquake Alerts என்ற விருப்பம் தெரியும்.
4. அதனை தட்டி, உள்ளே உள்ள toggle-ஐ ON செய்யவும்.

சதுரங்கம் கற்று தரும் செயலி

ஒரு விளையாட்டுச் செயலி என்ன செய்யும்? நண்பர்களுடன் சேர்ந்து விளையாடவும் பயணங்களின்போது பொழுதுபோக்கவும் பயன்படும். ஆனால், கற்றலையும் விளையாட்டையும் சேர்த்து சுவாரசியமாக வழங்குகிறது ‘செஸ் - பிளே அண்ட் லேர்ன்’ (Chess - play and learn) செயலி. உலக செஸ் விளையாட்டு ஆர்வலர்களின் விருப்பமான செயலி இது. இதைப் பயன்படுத்ததுவதும் எளிது. செஸ் விளையாட்டின் அறிமுகம் முதல் சவாலான போட்டிகள் வரை அனைத்தையும் உள்ளடக்கியது இந்த ‘செஸ் - பிளே அண்ட் லேர்ன்’ செயலி. அனைவருக்குமான செயலி: பிரபல செஸ்.காம் தளத்தின் தயாரிப்பான ‘செஸ் - பிளே அண்ட் லேர்ன்’ செயலியை ஐம்பது லட்சத்துக்கும் அதிகமானோர் பதிவிறக்கம் செய்துள்ளனர். கூகுளின் ‘பிளே ஸ்டோர்’, ஆப்பிளின் ‘ஆப் ஸ்டோர்’ தளங்களிலிருந்து இந்தச் செயலியைப் பதிவிறக்கம் செய்யலாம். செஸ் செயலியைப் பயன்படுத்த கட்டணம் கிடையாது. குழந்தைகள், பெரியவர்கள் தொடங்கி செஸ் விளையாட்டில் ஆரம்ப நிலையில் இருப்பவர் முதல் கிராண்ட் மாஸ்டர் வரை என அனைவருக்குமானது இந்த செஸ் செயலி. செயலியைப் பதிவிறக்கம் செய்தவுடன் முதலில் உங்களுக்கான கணக்கைத் தொடங்க வேண்டும். செயலிக்குள் நுழைந்தவுடன் இணையவழி விளையாட்டு, தினசரி சவால், செஸ் புதிர், கணினியோடு விளையாட்டு, தினசரி செஸ் பாடம் என முகப்புப் பக்கத்தில் வரிசையாகத் தலைப்புகள் தொகுக்கப்பட்டிருக்கும். பெரும்பாலான போட்டிகள் ‘ராபிட்’ எனப்படும் செஸ் முறையைப் பின்பற்றியதாக இருக்கக்கூடும். எனினும் சில போட்டிகளை ‘பிளிட்ஸ்’ முறையிலும் விளையாடலாம். பயனர்கள் தங்களுக்குத் தேவையானதைத் தேர்வு செய்து விளையாடலாம். இணையவழி விளையாட்டில், உலகின் ஏதாவதொரு பகுதியைச் சேர்ந்த ஒரு செஸ் ஆர்வலருடன் 10 நிமிடங்களுக்குப் போட்டி நடத்தப்படும். ஒவ்வொரு போட்டியின் முடிவிலும் வெற்றி பெறுபவருக்குச் சில புள்ளிகள் சேர்த்தும், தோல்வி அடைபவருக்குச் சில புள்ளிகள் குறைத்தும் வழங்கப்படும். இதன் மூலம் ஒருவருடைய விளையாட்டுத் திறனை அறியலாம். அது மட்டுமல்ல ஒவ்வொரு போட்டியின் முடிவிலும் விளையாட்டில் நீங்கள் என்ன செய்தீர்கள் என்பது குறித்த விளக்கத்தையும் இந்தச் செயலி வெளியிடும். அதில் சரியாகக் காய் நகர்த்திய இடம், தவறு நேர்ந்த இடம், சரி செய்துகொள்ள வேண்டிய ஆட்ட நுணுக்கம் ஆகியவை அடங்கிய விமர்சனக் குறிப்புகள் (Game Review) பயனர்களுக்கு வழங்கப்படும். ஆட்ட நுணுக்கங்கள்: ஆட்டக் குறிப்புகள் வழங்குவது மட்டுமல்ல ‘Self Analysis’ எனப்படும் சுய மதிப்பீட்டுக்கான வசதியையும் இந்தச் செயலி வழங்குகிறது. போட்டி முடிந்த பிறகு, நீங்கள் விளையாடிய விதத்தை ஆராய்ந்து, குறிப்புகள் எடுத்துக்கொண்டு சுயமதிப்பீடு செய்துகொள்ள இது உதவும். செஸ் பாடம் பகுதியில் காய் நகர்த்தலுக்கான பாடம் கற்றுத் தரப்படுகிறது. இதில் போட்டியின் தொடக்கத்தில் ஆடக்கூடிய ஆரம்ப நகர்த்தல், தோல்வியைத் தவிர்க்க அல்லது டிரா செய்ய உதவும் தடுப்பு ஆட்டம் ஆகியவற்றுடன் நிறைய பயிற்சி ஆட்டங்களையும் இந்தப் பகுதி கொண்டுள்ளது. நண்பர்களுடன் சேர்ந்து விளையாட விரும்புவோர் போட்டிக்கான அழைப்பு இணைப்பை நண்பருக்கு அனுப்பலாம். அவர் இணையும்பட்சத்தில், இருந்த இடத்திலிருந்தே செஸ் போட்டிகளில் விளையாடலாம். தொடர்ந்து செஸ் விளையாட்டில் பயிற்சி பெற விரும்புவோர், ஆட்ட நுணுக்கங்களைச் செம்மையாக்கிக்கொள்ள இந்த செஸ் செயலி பயனுள்ளதாக இருக்கும்.

சங்கீதச் செயலி

அந்தக் காலம் முதல் இந்தக் காலம் வரை மனித வாழ்க்கையில் இசை ஓர் அங்கமாக இருந்து வந்திருக்கிறது. நாட்டுப்புற இசை, திரையிசை, சுயாதீன இசை எனப் பல வகைகளில் பரிணமிக்கும் இசை, தனி மனித வாழ்விலும் தாக்கத்தை ஏற்படுத்தி வருகிறது. முறையாக இசையைக் கற்றுக்கொள்ள இசைப் பள்ளிகளுக்குச் சென்றது அந்தக் காலம். டிஜிட்டல் யுகத்தில் இணையம் வழியே இசைக்கருவிகளைக் கற்றுக்கொள்வதுதான் டிரெண்டிங். அந்த வகையில் இசை ஆர்வலர்களுக்கு ஓர் அட்டகாசமான செயலிதான் ‘யுசிசியன்’ (YOUSICIAN). இணையத்தில் இசை: ‘யுசிசியன்’ செயலியை கூகுளின் ’பிளே ஸ்டோர்’ அல்லது ஆப்பிளின் ’ஆப் ஸ்டோர்’ தளங்களிலிருந்து பதிவிறக்கம் செய்துகொள்ளலாம். கிடார், பியானோ, உகுலேலே (கிடார் போன்ற தோற்றத்தில் இருக்கும் சிறிய இசைக்கருவி), பாஸ் கிடார் போன்ற இசைக்கருவிகளையும், பாடுவதற்கான அடிப்படையையும் சொல்லித் தருகிறது ’யுசிசியன்’ செயலி. உங்களுக்கான ஒரு கணக்கைத் தொடங்கியதும், முதலில் விருப்ப இசைக்கருவியைத் தேர்வுசெய்ய வேண்டும். அடுத்ததாகப் பாரம்பரியம், ராக், பாப், ஜாஸ், ஹிப்-ஹாப், எலெக்ட்ரானிக், ஃபோக் எனப் பட்டியலிடப்பட்டிருக்கும் இசை வகைகளிலிருந்து விருப்பமானதைத் தேர்வுசெய்ய வேண்டும். ’யுசிசியன்’ செயலியின் இசைப் பாடங்கள் இசைக்கருவி வாசிப்பு குறித்து அறிமுகம் இல்லாதவர்கள், ஆரம்ப நிலையில் இருப்பவர்கள், ஓரளவு வாசிக்கத் தெரிந்தவர்கள், இடைநிலையில் வாசிக்கத் தெரிந்தவர்கள், இசையில் தேர்ச்சி பெற்றவர்கள் என ஐந்து பிரிவுகளாகப் பிரிக்கப்பட்டுள்ளன. இதில் பயனர் தேர்ந்தெடுக்கும் ஒவ்வொரு பிரிவுக்கும் ஏற்ப இசைப் பாடங்கள் தொகுக்கப்பட்டுள்ளன. இது மட்டுமல்ல, பயனரின் இசை ஆர்வத்தையும் ஆரம்பத்திலேயே கேட்டுத் தெரிந்துகொள்கிறது ’யுசிசியன்’ செயலி. அதாவது, பொழுதுபோக்கிற்கு வாசிக்க கற்றுக்கொள்ள வேண்டுமா? முறையாக வாசிக்க கற்றுக்கொள்ள வேண்டுமா என்பது போன்று 6 கேள்விகள் கேட்கப்படுகின்றன. பயனரின் தேர்வுக்கு ஏற்ப பாடங்கள் வழங்கப்படுகின்றன. பயிற்சி அவசியம்: முதல் கட்டமாக வாரந்தோறும் இரண்டு அல்லது மூன்று நாள்களுக்கு வகுப்புகள் நிர்ணயம் செய்யப்படும். இப்பயிற்சி வகுப்புகளுக்கான கட்டணம் எதுவுமில்லாமல் முதல் ஏழு நாள்களுக்கு இசைப் பாடங்களைக் கற்கலாம். அதன் பிறகு, குறிப்பிட்ட கட்டணம் செலுத்தி ‘யுசிசியன்’ செயலியைப் பயன்படுத்தலாம். ஏழு நாள் பயிற்சிக்குப் பிறகு ஒரு மாதம், ஓர் ஆண்டு என்ற கணக்கில் கட்டணம் செலுத்தி தொடர்ந்து ‘யுசிசியன்’ செயலியைப் பயன்படுத்தலாம். கட்டணம் செலுத்துபவர்களுக்கு இசைப் பாடங்களில் கூடுதல் அம்சங்கள் வழங்கப்படுகின்றன. இசை பாடங்களைக் கற்றுக்கொள்ள விருப்ப இசைக் கருவியுடன் சேர்ந்து, திறன்பேசி அல்லது டேப் இருந்தால்போதும் ’யுசிசியன்’ வழியே பயிற்சியைத் தொடங்கலாம். இசைப் பயிற்சியில் வாசிப்பு குறித்த பரிந்துரைகள், விமர்சனங்களும் பயனருக்கு வழங்கப்படுகின்றன. தேர்ந்த இசைக் கலைஞர்களால் தொகுக்கப்பட்டிருக்கும் இசைப் பாடங்கள் படிப்பதற்கு எளிதாகவும், சுவாரசியமாகவும் இருப்பது இதன் சிறப்பம்சம். வாசிப்பின் ஒவ்வொரு கட்டத்தையும் முன்னேற்றத்தையும் இந்தச் செயலி வழியே பயனரால் பின்தொடர முடியும். தொழிற்முறை இசைக் கலைஞராக அல்லாமல் சுய விருப்பத்துகாக இசைக் கருவிகளை வாசிக்க நினைப்பவர்கள் அறிமுக இசைப் பயிற்சியைப் பெற இந்தச் செயலியைப் பயன்படுத்திப் பார்க்கலாம்.

உள்ளங்கையில் உலகம்

இருக்கும் இடத்திலிருந்தே உலகைச் சுற்றிப் பார்க்க, பண்பாட்டு கலாச்சாரங்களை அறிய, தகவல் தெரிந்துகொள்ள ஆசையா? ‘Google arts & culture’ செயலி அதற்கு உதவுகிறது. இந்தச் செயலி கலை, பண்பாட்டுத் துறையில் ஆர்வமிகுந்தவருக்கான தகவல் களஞ்சியம். கற்றல் எளிது: கூகுள் ‘பிளே ஸ்டோர்’ அல்லது ஆப்பிளின் ‘ஆப் ஸ்டோர்’ தளங்களிலிருந்து இச்செயலியைப் பதிவிறக்கம் செய்யலாம். இதில் தொகுக்கப்பட்டிருக்கும் தலைப்புகளைத் தேட, செய்திகளை வாசிக்க, தகவல் பகிர கட்டணம் எதுவும் செலுத்தத் தேவையில்லை. செயலியைப் பதிவிறக்கம் செய்து, மின்னஞ்சல் முகவரியைப் பதிவுசெய்து பயன்படுத்தத் தொடங்கலாம். இதில் 'தேடு, விளையாடு, படி' என மூன்று தலைப்புகள் கொடுக்கப்பட்டிருக்கும். உலகின் பல்வேறு நாடுகளின் வரலாறு, கலை, கைவினைப் பொருள்கள் தயாரிப்பு, ஃபேஷன், பயணம், உணவு, விளையாட்டு, அறிவியல் ஆகியவற்றின் தகவல்கள் சுவாரசியமாக ஒளிப்படங்களுடன் தொகுக்கப்பட்டுள்ளன. கிரீஸ் நாட்டின் பிரபல ‘அக்ரோபோலிஸ் அருங்காட்சியகம்’ முதல் ராஜஸ்தானின் பாரம்பரிய ‘சிந்தி சாரங்கணி’ இசைக் கருவி வரை பல்வேறு தலைப்புகளையும் தேடிப் படிக்கலாம். ஒவ்வொரு தலைப்பின் கீழும் சுருங்கச் சொல்லி விளங்க வைக்கும் முறையில், ஆங்கில மொழியில் ஒரு பத்தியில் விளக்கங்கள் தரப்பட்டுள்ளன. ஒரு தலைப்பையொட்டி கிளை தலைப்புகளும் அதில் பரிந்துரைகளும் பயனர்களுக்குச் சுட்டிக் காட்டப்படுகின்றன. கலையும் விளையாட்டும்: குழந்தைகள் முதல் பெரியோர் வரை இது அனைத்து வயதினருக்குமான செயலி. குழந்தைகளைக் கவரும் வகையில் கலை சார்ந்த தகவல்களுடன் கூடிய விளையாட்டுகளும் இச்செயலியில் உருவாக்கப்பட்டுள்ளது. செயற்கை நுண்ணறிவு வசதி பொருந்திய விளையாட்டுகள், பயனர்களுடன் உரையாடக்கூடிய வகையில் வடிவமைக்கப்பட்டுள்ளன. வார்த்தை விளையாட்டு, புதிர்கள், வினா விடை ஆகியவற்றுடன் வண்ணங்கள் பூசுவது, 3டி முறையில் மட்பாண்டங்கள் செய்வது போன்ற பயிற்சிகளும் வழங்கப்படுகின்றன. வாசிக்க பார்க்க: உலகப் புகழ் பெற்ற அருங்காட்சி யகங்கள் பலவற்றின் அறியப்படாத தகவல்கள் செய்திகளாகத் தொகுக்கப் பட்டுள்ளன. உதாரணத்துக்கு, நெதர்லாந்தின் வின்சென்ட் வான் கோ அருங்காட்சியத்தின் ஓவியங்கள், வான் கோ படித்த புத்தகங்கள், வாழ்க்கை வரலாறு ஆகியவற்றின் தகவல்கள் வெவ்வேறு பகுதிகளாக சுவாரசியமாகத் தொகுக்கப்பட்டுள்ளன. அதுமட்டுமல்லாது, அருங்காட்சியகத்தின் ஒவ்வொரு பகுதியையும் தரைத் தளம், முதல், இரண்டாம், மூன்றாம் தளங்களாகப் பிரித்து ‘விர்ச்சுவல்’ பயணத்துக்குக் கூட்டிச் செல்ல இச்செயலியில் வசதிகள் உள்ளன. என்ன பயன்? - உலக நாடுகளின் தொண்மையான கலாச்சாரம், நாகரிகம் போன்றவற்றின் தகவல்கள் எழுத்துக்களாக புத்தக வடிவில் கிடைப்பது வழக்கம். தொழில்நுட்ப வளர்ச்சிக்குப் பிறகு எழுத்து வடிவிலான தகவல்களை ஒளிப்படங்களாக, காணொளிகளாக மாற்றும் முயற்சிகள் எடுக்கப்பட்டன. அவற்றை இணையதளத்தில், யூடியூப் போன்ற சமூக வலைதளத்தில் தேடினால் காண வாய்ப்பு கிடைக்கும். திறன்பேசியின் ஆதிக்கம் மேலோங்கி இருக்கும் இந்தக் காலகட்டத்தில் கலை சார்ந்த தகவல்களை ஒரே செயலியில் உள்ளடக்கும் வேலையைத்தான் கூகுள் செய்து வருகிறது. தகவல்களைத் திரட்டத் திரட்ட இச்செயலியில் பதிவேற்றம் செய்து கொண்டே வருகிறது கூகுள். கொட்டிக்கிடக்கும் தகவல்களைப் பயன்படுத்த எளிது என்பது இச்செயலியின் சிறப்புகளில் ஒன்று. எனவே கலைத்துறை சார்ந்து இயங்குபவர், கல்வி கற்பவர், ஆராய்ச்சியில் ஈடுபடுபவருக்கான மிகவும் பயனுள்ள செயலி இது!